梁榮忠噚日朝早喺港台開咪，爆阿媽前日遇上電話騙案，情節就同《警訊》講嘅一樣。有個男人下晝1點幾打畀忠仔阿媽，話佢欠債18萬，𠵱家喺個男人手上，叫梁媽媽攞錢贖佢，好彩梁媽媽醒目冇俾騙徒呃！
猛叫哎吔博同情
馮仁昭噚日打電話畀忠仔問番件事，佢話：「我做完節目冇幾耐阿媽就收到電話，嗰個男人話自己姓陳，先同我阿媽講話我欠債18萬，之後就有另一個男人扮我，喺後面猛咁哎吔哎吔咁叫，又話打到佢好痛好慘，叫我阿媽快啲救佢。」
忠仔話最好笑係佢阿媽話冇18萬之後，嗰個人竟然問佢阿媽幾百蚊有冇，佢阿媽當然知道係呃人啦！忠仔引述佢阿媽嘅說話都幾好笑，佢話：「我阿媽同個男人講『我養大咗個仔咁多年，佢都冇攞過錢返嚟呀！你同我打死佢啦！』」忠仔好欣慰阿媽冇俾騙徒呃，但佢話希望啲騙徒收手，唔好再做喇！
撰文：馮仁昭