在whatsapp內的約踢波群組已多到數唔晒，各群組可能相識自不同年紀、來自不同背景；但有趣的是，每組均可找到以下各款「隊友甲乙丙」，你又屬於邊一種？
「聯絡主任」：最熱心組織，由book場、約人、約對手、睇款造波衫通通包辦。他肯定是全隊付出最多之人，甚至冇佢波都踢唔成，但很可惜，其超凡組織能力未必可應用到日常正職之上。「好波之人」：盤傳射皆精，入波靠晒佢，可惜紀律最差，場場例遲，且狀態非常飄忽。「躁底王」：人哋落場飲水；佢哋落場就食火藥！被人踢中，立即問候人母親，又或者追住球證喪鬧，不過呢類人喺場外可能係極之斯文有禮！「指揮家」：不理親疏、唔理輩份，總知要指揮所有人，走位交波都關佢事，不過人哋交到腳佢就叫人畀位，人哋畀位佢又叫人交到腳……「Hea龍」：猜輸守龍，例牌「Hea」守，爭啲跳開避個波。「出席王」：可能跑得最慢、踢波最屎，但逢波必到、有早無遲，唔係佢，你可能永遠唔夠人開波。
認清自我成功百倍
認清角色，隨時可以改變人生。試想如「聯絡主任」可將組織力和熱誠投放到工作；「好波之人」學識自律；「躁底王」識控制EQ；「Hea龍」不再Hea；「出席王」將堅持伸延至各項目標……咁人生係咪可以成功百倍？講到踢波可認清自我咁有意義，可惜要開工湊仔陪老婆嘅我，卻發現自己的角色已變成「飛機王」。
方柏翹
now足球評述員