梁愛詩話唔放心二十年後香港由今天嘅青年人管，羅范淑芬引述移民朋友說話，指移民理由係怕咗今日嘅年青人。呢兩位女士嘅說話是否可信，你自己可以諗諗。
梁愛詩之唔放心，無人幫到佢，梁愛詩不知年紀有幾大，起碼有七十零喇啩？二十年後董伯伯係九十七歲，梁愛詩亦會年過九十，梁振英八十歲，想唔交棒都唔得啦，譬如梁振英在58歲做特首，已比董曾兩位前任年紀輕，2012加20等於2032，正係選特首之年，假如話到時嘅特首係58歲，在2014年就係40歲，佢嘅局長隊伍在2014年大概係30歲過外，試問今日城中政治人物，有邊一位40歲人士有潛質（即（一）有能力，（二）得中央信任，（三）有民望）成為2032年香港特別行政區長官㗎？如果我係梁愛詩，真係好驚，唔怪得不少建制派之富二代，富三代呢幾年紛紛出動，組織不同社團，爭取NGO職位，以求曝光啦。須知道，梁振英在30歲時（1980）已經積極參與時事活動嘅嘞。
假定今日30歲，二十年後有乜思維，好難估算。前星期，英國回流香港嘅O先生請左丁山到香港會吃午飯，記得O先生在90年代中已帶同家人搬去英國，佢哋同時有英國國籍及紐西蘭籍，點解幾年前會回流香港呢？O先生話：「仔女大咗，好想返出生地方香港發展，佢哋在香港讀書長大，喺英國讀完大學就開始思念香港生活，於是我哋又返嚟。照我所知，好多香港出世嘅歐亞混血都係咁樣諗，唔少仔女嘅國際學校同學皆是如此。」哦，唔怪得呢幾年在蘭桂坊蘇豪一帶，見到不少年輕英文人，男女成群，連到西環嘅酒吧亦開到成行成市。在英美加澳紐出生之本地人移民子女（即二十幾年前在彼邦出世嘅）更多回流，過往佢哋父母在80年代移民話係為咗下一代，點知下一代成長後，仍然要返回香港，羅范椒芬嘅朋友不妨參考吓，你哋話怕咗今天香港年青人而移民，但難保你哋嘅仔女長大後要返回香港呢！今天之二十幾三十歲人會係2032年之政府及商界骨幹，二十年後香港嘅政治生態如何根本無從預測，聽梁愛詩之言，大概中央已責成中聯辦大搞青年統戰工作，傳聞話梁振英會在1月份嘅施政報告建議成立青年事務委員會，由林鄭負責，睇嚟青年思想爭奪戰即將開始。