賭王何鴻燊嘅左右手、澳博（880）行政總裁蘇樹輝（Ambrose）寫得一手好字、畫畫亦一流。佢應母校香港大學教研發展基金會嘅邀請，喺港大舉行個人書畫展，展期至本月22日。賭王四太梁安琪噚日現身開幕禮不特止，仲即場要求Ambrose送一幅以雞為題嘅畫畀賭王㖭。
四太噚日一到場就大讚Ambrose好犀利，唔單止寫書法，仲連畫都畫埋。佢行咗一圈，就要求Ambrose將其中一幅畫咗隻雞嘅畫，送畀屬雞嘅賭王做生日禮物，Ambrose當然應承喇。
除咗四太畀面，恒地（012）副主席林高演亦現身支持。林高演除咗係港大基金副主席之外，仲係Ambrose嘅舊同學。雖然林高演因開會遲到，但Ambrose見到佢就好開心，搭晒膊頭咁帶佢周圍睇作品，林高演睇完即刻笠對方高帽話，「我哋雖然係同班同學，但係寫書法，佢就高我一班喇」。
Ambrose話，細路仔時已愛上寫書法，上到大學先有系統咁學。至於畫畫，主要係想感受乜嘢叫書畫同源，畫咗一年都冇，仲話拎出嚟好失禮人喎，認真謙虛。