以下故事內容，半真半假：
話說，冇晒法力嘅孫悟空同唐三藏來到今日香港，佢哋收到佛祖啟示，要去何文田一個地方取經。取咩經？Sorry，Google神都答唔到，佢哋只知道，旅途上要先過關！第一關，係要見一個女人。
面前呢個女人，四十幾歲，著住套Suit，塗上完全唔襯嘅紫藍色眼影，一睇，好難唔令人聯想起保險Agent！佢先嘆一口氣，「你地來啦，等你哋好啦。」再嘆一口氣。我呢關好簡單，你地睇完呢條片，答我呢條MV想表達啲咩。女人將佢部iPad轉向悟空同唐僧，開咗一條片，果然！真係AIA（1299）嘅片（ http://on.fb.me/1ycXdFe）
唔開由事可，一開，真係不得了。一聽intro，就知要Yo住Check住扮猩猩咁唱。果然，隻MV劈頭就係咁YO住講「AIA、AIA」。然後成隻MV，就係一眾老中青友邦管理層，以一身Hip Pop嘅打扮，係咁repeat「Who is the best?It's AIA」「Who is the best?It's AIA」
好唔容易，悟空同唐僧終於睇晒成條片，兩師徒皺晒眉，女人問，「點呀，答到未？」悟空：「一定係AIA is the best啦！」「錯！」「唔係呀嘛，講Who is the best?It's AIA足足講咗15次，都錯？」
然後唐僧淡淡然回應，「答案係，搵食艱難，善哉善哉」女人望一望唐僧，隱隱見到眼泛淚光，用一把哭腔講「大師，冇錯，搵食啫，係咁架啦，你地去下一關啦。」然後佢交咗個錦囊俾唐僧。
離開時，唐僧話，「悟空，師傅明白了。原來你面對緊箍咒時，係咁痛苦。」
＊＊
兩師徒打開個錦囊後，就落咗金鐘龍和道，搵一個人氣急升嘅藝人王宗堯。
落到去見到呢位王先生，雖然戴住頭盔，但人戴頭盔，佢戴頭盔，真係唔明點解戴頭盔都可以戴得咁有型。難怪坊間有位叫杜秋棠嘅人兄，都概嘆：「王宗堯，啲女畀你媾晒啦！」
佢Chok住咁問，「悟空、唐僧，第二關問題係，點解我要戴頭盔？」唐僧今次反應好快，淡淡然回應：「答案係，你係香港人，善哉善哉。」「大師果然有智慧，我係落嚟支持學生。」
悟空唔明點解一個藝人，咁夠膽身體力行做「黃絲帶」，「你唔怕你返唔到大陸呀？」王宗堯先好型咁冷笑一聲，「搵食啫，唔使出賣良心嘅。」講完，佢就Chok住交低第二個錦囊，然後雙手插袋，轉身，好似Model行Catwalk咁消失於人群。
＊＊
拆開呢一個錦囊，入面張紙寫住「何文田山畔」，呢一刻，佢哋終於知道個目的地喺邊。兩人繼續踏上旅途，向目的地進發。行行下，突然有人喺悟空身後慘叫一聲，「啊！你襲警！」
此時四方八面都有警察衝上前，企圖將悟空強行制服喺地下。「講！你兩個做咩襲警！」「我冇呀，係佢自己撞埋我度！」悟空急否認，「仲駁嘴？」
此時，唐僧上前，「咁多位差大哥，我哋兩個正前赴何文田取經，我諗佢係冇心嘅，你放咗佢把啦，善哉善哉。」其中一名警察一臉鄙視的問「何文田？何文田邊度？」
然後唐僧拎方才張紙出來，然後那警察面上掛上不懷好意嘅笑容，「大師，出家人唔講大話，你竟然講大話？」「我冇呀，我真係去何文田！」「大師，你仲狡辯？何文田山畔唔喺何文田，喺紅墈架！」「點解…」「咩點解呀？日出康城都可以唔喺法國康城？曼克頓山亦都唔喺曼克頓？咁點解何文田山畔唔可以唔喺紅墈？瑞士都冇瑞士雞翼啦！搵食啫，吹呀？」
呢個時候，喺地下嘅悟空又慘叫一聲，然後有人就話，「搵食啫，犯法呀？」
by千頌C@堆填區
http://fb.com/winbigwok