噚日氣溫得番十幾度，又提大家冬天嚟到，唔經唔覺踏入12月，其實每年年尾各大頒獎禮陸續舉行，國際足協周年頒獎禮又定出最後候選人名單，金球獎最後3強為基斯坦奴朗拿度（C朗）、美斯同紐亞，C朗衞冕呼聲好高，連贊助商奧迪送車都豪過送畀美斯嗰架。
今年屬世界盃年，不過既然美斯已經喺2010年打破世界盃冠軍成員拎金球獎慣例，就算C朗率領嘅葡萄牙，喺巴西世界盃分組賽出局，不過以佢協助皇馬贏歐聯同西盃兩個錦標，加上做埋西甲神射手，蟬聯呼聲都好高。英國skyBet開出嘅金球獎賠率，C朗竟然熱到只得1.17倍，遠遠拋離8倍嘅美斯同紐亞。
獲贈靚車威過美斯
人紅自然多人錫，好似德國車廠奧迪，本身贊助開皇馬同巴塞兩支班霸，亦為兩隊球員提供座駕，上周五美斯就獲贈房車A7，喺香港車價就約90萬，奧迪周一就向皇馬球員派車，C朗獲贈高幾級嘅房車S8，喺香港車價就約200萬，嘩，車價爭成倍，咁厚此薄彼，C朗當然笑晒啦。
其實德國今年打破洲份宿命，喺巴西第4度捧世界盃，好多人都支持德國國腳拎金球獎，好似柏天尼早前已經呼籲，而最後3強名單出爐，車路士門將施治都撐同行紐亞。德國同拜仁慕尼黑1號門將紐亞，今年表現穩健，贏世界盃之餘，又拎埋德甲同德盃，可惜金球獎咁多年嚟都冇門將份。不過有冇獎都好，紐亞情場得意一樣咁開心，上周六拜仁作客1:0擊敗哈化柏林，周中冇比賽下，球隊就放人，畀紐亞留喺柏林，同新女友Nina拍拖，情到濃時兩人仲街頭激吻㖭。
另外，皇馬嘅哥倫比亞中場占士洛迪古斯，喺世界盃16強對烏拉圭嘅轉身抽射，亦都成為代表最佳入球嘅普斯卡斯獎嘅莊家大熱門，連埋入圍最佳教練嘅安察洛堤，皇馬隨時包辦3獎。
識睇，一定係睇足英台【英波Live】：
http://soccer.appledaily.com
http://bit.ly/engballlive