香港地少，但有唔少大自然靚景。旅發局「香港郊野全接觸」推廣瘋狂「鳩嗚」以外嘅深度旅遊，除咗推介地質公園，今年新增三條有特色嘅遠足路線，包括最南端嘅蒲台島；地貌獨特嘅塔門；同最啱睇沉積岩嘅東平洲，連埋山頂、西貢總共七條線。
旅發局話，去旅行行山仍然係小眾啲，但係近兩年多咗遊客對香港嘅郊野同地質公園有興趣。
請俄「follow me」影后宣傳
事關香港山水相連，有日本遊客話，當地名山富士山行極都係山，香港就唔同，只要行高少少就一次過飽覽山景同海景；韓國同歐美都有捧場客。
旅發局最近仲請到影背影旅行相影到出晒名嘅俄羅斯情侶檔「follow me」嚟影番輯相，八方率先拎到一張作品，相當靚！
而喺西貢嘅火山探知館，7月開幕以來冇乜冷場，平均每月400人參加導賞團。導賞團逢周六、日同公眾假期必定成團，如果天氣好，可以坐船去到萬宜水庫東壩，沿途欣賞海蝕洞同海蝕柱，玩足成個下晝。