恒隆地產（101）老闆陳啟宗不嬲唔係高大威猛型，之但係，佢噚日出席亞太區房地產領袖高峯會做演講嘉賓時，竟然高咗成呎。原來主辦單位特登喺演講台上，放咗一個目測約一呎高嘅木箱畀陳啟宗企上去演講，可能個木箱墊得太高，搞到陳啟宗全程都要微微彎底身，就住就住咁講。
好有幽默感嘅陳啟宗企喺木箱度講講吓樓市前景，忍唔住向觀眾踢爆自己忽然高咗全靠出術。佢話「唔好睇我𠵱家好似好高，適合打籃球咁款，其實係有嘢墊高咗我」。
一講到內地二線城市商場，陳啟宗又打比喻，將自己同型男畢彼特比較，自嘲話兩個人企埋一齊，係人都揀畢彼特喇，但係跟手佢就形容恒隆喺內地嘅商場質素好似畢彼特咁，踩完自己，轉過頭就讚番自己嘅商場，真係要畀個服字佢。