45歲嘅英籍練馬師Gibson高伯新來港開倉幾年，事業發展得唔錯，旗下一對同主馬「大運財」及已退役嘅「事事為王」屢贏大賽，近日亦有「福毅」奪得本身在港第五捷，高伯新可以話名利雙收。不過喺感情方面，Gibson一向好低調，佢有一對子女，但已經同妻子分開多年。來港開倉後，曾與澳洲前賽馬節目主持Jo Mckinnon拍拖，阿Jo亦曾受聘於香港馬會，擔任越洋賽客串評述員，上年高伯新憑「事事為王」捧走香港盃，當時佢同阿Jo其實已甩拖，但賽後Gibson仍接受阿Jo訪問，兩人表現專業，未有出現尷尬情況。
至於Gibson現任女友Flora係香港一所國際學校教師，據知Flora脾氣好好溫柔體貼，又與Gibson一對仔女相處愉快，深得高伯新歡心。據高廐「旅遊首席」馬主黃士心透露，Gibson同Flora已決定本月22日前往英國拉埋天窗。
康泰老闆黃士心與高伯新私底下非常友好，兩人上季曾一起去英國皇家雅士谷賽期觀戰，並順道往愛爾蘭物色良駒，家陣黃士心家族有「旅遊仁義」、「旅遊首席」、「旅遊狀元」及「旅遊大使」交由高伯新訓練，其中「旅遊仁義」剛周日跑第三，黃士心話好滿意表現，仲話祝高伯新同Flora永結同心。