自由黨噚日公佈新一任黨魁兼未來路向，由於冇再續租九龍灣總部，所以佢哋改喺金鐘中信大廈嘅名人飯堂「東海薈」搞記者會。以為八方搞錯、嗰度冇間食肆叫「東海薈」？查實呢間「東海薈」，咪就係之前嘅「海都」囉，即係喺政總返工嘅高官名人，貪近而頻頻幫襯嗰間飯堂。
無啦啦做乜要改名？自由黨飲食界議員張宇人透露，由於呢個集團早前有主要股東變動，相信因此喺近日，將「海都」易名為「東海薈」。雖然主要股東變咗，但廿蚊張話呀，海都嘅舊有員工班底冇變動，換言之食物質素同服務態度如昔；八方亦問過啲侍應，佢哋都話大老闆變咗箒，冇乜影響工作。而佔領運動雖然有影響到中信食肆嘅生意，但廿蚊張話呀，業主堅持唔肯減租，都係問題所在嚟㗎喎。