講起人民力量，大家一定記得一對孖寶：快必譚得志同慢必陳志全。前者做過DJ，後者係立法會議員，知名度有番咁上下，但其實好多人都搞唔清邊個係快、邊個係慢。就連法官，都有呢個難題。
暉暉庭上「釣魚」
話說譚得志噚日同包括學聯岑敖暉Lester在內、四個喺旺角清場時被捕嘅被告直上高院，希望更改保釋條件，放寬針對佢哋嘅旺角禁足令。當律政司代表喺庭上覆述一段譚得志拍嘅視頻對白，最後一句係「我就係我，快必譚得志」，法官彭偉昌即刻問控方：「佢花名叫快必，咁阿陳……」個「陳」字音維持咗四五秒，仍然噏唔出陳志全個名，要由控方答「佢叫慢必」解圍。
查實政界有套分辨快慢必獨門秘方，就係：睇身形，知快慢。身形圓啲脹啲嘅就係快必，瘦削斯文啲嘅就係慢必，彭官都似乎要學吓呢套認必方程式嘞。
而Lester也許因為佔領行動升級而太累，噚日喺庭上坐坐吓竟然睡一睡。彭官睇到後冇叫醒呢位萌爆睡寶寶，只向代表Lester大狀潘熙講：「你個當事人好疲累喎！」潘狀即刻為Lester辯護：「佢噚晚冇瞓。」跟住仲苦笑住話：「我都係。」呢個時候，Lester都仲未醒，最終由坐喺附近嘅其他被告叫番醒佢。
李八方
mailto:[email protected]