【雨傘革命】36歲的王宗堯入行逾10年，一直寂寂無聞，直至近日憑港視劇《選戰》張癸龍一角成功彈出。劇中不惜踩界助李心潔踏上特首之路的王宗堯，現實生活亦是個熱血青年，前晚雙學發動包圍政總，王宗堯無懼警方暴力驅散，一身裝備現身龍和道為學生打氣，一句「點解唔嚟得？我都係香港人嚟。」被網民激讚型爆，王宗堯昨說：「我嘅良心話畀我聽，係應該行出嚟。」
佔領行動前日第64日，學聯和學民思潮將行動升級發動包圍政總，其間與警方爆發衝突，有示威者被警方打至頭破血流，不少市民趕到金鐘支援，包括近日憑《選戰》張癸龍角色而人氣急升的王宗堯。前晚學民思潮在facebook貼上王宗堯現身龍和道的照片，相中他戴上頭盔及掛上眼罩，並留言：「點解唔嚟得？我都係香港人嚟。」被網民盛讚有型有骨氣，瞬即將他封為男神。
原來王宗堯留守至昨日凌晨4時許才離開，他返家後亦有在fb向各方好友報平安。對於網民激讚，王宗堯昨在電話中淡然說：「我身邊有好多朋友都咁做，當然我哋受注目嘅程度係比其他人高，但係唔覺得因為咁而對我有牽制。」他揚言是響應雙學呼籲前往金鐘，前晚完成工作後於晚上9時到場會合朋友，他說：「我哋喺添馬公園靠近龍匯道，最初只係見到好多人圍住，但無耐見到差人開始打前排嘅示威人士，我哋想睇吓有乜嘢可以幫到手，所以好快走咗去示威嗰邊，靠近暗角嗰邊個草坡，直到差唔多兩點清場嗰陣，有人大嗌盡快向後退，咪向碼頭嗰邊走。我哋留到4點幾先決定離開，臨走前將自己啲頭盔同用具畀最前線嘅人，返到屋企睇新聞睇到好攰先瞓得着。」
匿埋唔睇更可悲
提到昨日凌晨留低裝備，王宗堯直言心情難過：「唔知點解香港會變成咁，我嘅良心話畀我聽，係應該行出嚟，我唔忍心亦唔放心留喺屋企，我有好多朋友一直都冇離開過，死守咗好多晚，我會覺得當你假裝當冇一件事，匿埋做鴕鳥唔去睇，你比嗰啲人更加可悲！」未知經理人有否反對他繼續站出來？王宗堯說：「呢兩年出咗嚟好多次，包括國教、HKTV、7.1、六四，甚至劉進圖事件，老闆同同事都知，佢哋知我咁大個人，有判斷能力，所以唔反對，只要唔激進就得。」
可擔心事件惡化？他說：「我見到今朝政府出聲明，譴責所有出嚟嘅市民同示威學生，我睇到好痛心。由學生衝入公民廣場嗰一刻，原意係保護學生，冇諗過會進化到今日呢個地步，只不過時勢係要去到呢一刻，要用自己能力去做呢一刻啱嘅嘢！呢一刻我對得住自己個良心。」
首要保護「屋企」
獲網民讚賞同時，也受不少網民攻擊，王宗堯說：「噚日有啲網友關注我微博，講咗啲好難聽同侮辱性嘅說話，好似話我唔使去大陸市場、唔使拍戲，我會覺得呢個始終係我屋企，如果將你自己屋企同埋工作去權衡呢件事，要為工作犧牲屋企，甚至乎你嘅屋企人，普通正常人都會保護咗自己屋企先！好多香港人都係咁做，令到我哋好感動，喺呢件事上，學生都好成熟，以前話90後態度好差，承受唔到壓力，但係𠵱家會見到呢一班好聰明同勇敢嘅學生。」
採訪：何慧斯
【網民熱話】「起碼走在最前線」
王宗堯於《選戰》表現突出，前晚他走入龍和道與學生並肩作戰，即被封新一代「男神」，但亦有網民喪鬧他參與佔中運動。
支持派
DeeDee Fung：「我都覺佢戴住呢頂帽就更加靚仔！有吉屎，預咗放棄大陸市場。」
Johnny_Deep：「唔算靚仔但係啲佬味真係幾型。」
Kammy Shum：「我覺得起碼走在最前線，唔係好似其他咁一味講，但食棍都冇食過」
Yo Yo Wong：「喺《選戰》入邊已經好型，𠵱家仲行出來型上加型。」
反對派
哎德萌：「知道自己在大陸火不了，冒險放棄大陸市場賭香港，最後送你一個字，X你媽了。」
小駒哥：「你就在香港待着吧，跟大陸說拜拜吧。」
詹尖沾-James：「有本事都唔會喺HKTV網絡電視hea啦，都係霉星先會喺嗰度。」
牛牛612345：「拍過甚麼的？垃圾！還能入關內地嗎？不舉報都對不起你呀！」