渝港國際（613）出售確利達（1332）證券投資，為渝港賺咗8,000萬元，喺嚟緊全年度成績單，博渝港有甜品派。
渝港原先揸確利達1,434萬股或9.97%，後邊確利達，今年7月開始，平地一聲雷，股價一嘢爆升近9倍，到8月尾達8蚊水位。渝港把握呢轉爆升食糊，喺市場分兩次以約6.2元水平沽出，變現9,000萬元，估計獲利8,000萬元。呢壇製作，係渝港本業以外唔錯嘅bonus，喺嚟緊嘅全年度成績單，可以博有甜品派送。又除咗確利達，渝港亦揸咗中渝置地（1224）2.6億股或10%權益。最近幾年，內房股冇運行，中渝冇為渝港帶嚟肥仔增值。
目標0.16元 睇升四成
但係要咁睇，阿爺取消內房限購令，加埋息口調控，殘咗咁耐嘅內房股，無論未來實際銷情，又或者股價表現，會有機會大翻身。更何況，中渝本身嘅預售靚仔（到咗今年6月，預售金額達160億元），又揸過億平方呎嘅土儲，食住內房新一輪嘅增長期，NAV大有升值潛力，獲利戰鬥力亦高咗。而家陣渝港揸住中渝權益，等值3.8億元咁大把，若果對應中渝2007年高位18蚊，呢撼貨等值47億元，足足係渝港家陣市值嘅4.7倍，或渝港每股0.5元！
又同確利達一樣，渝港揸中渝權益，視為證券投資，就當渝港喺嚟緊日子冇嘢搞，但中線嚟講，若果中渝煲到大茶飯，渝港一樣可以照辦煮碗，沽售套利。
咪扯咁遠，渝港9月中見高位0.161元後，已調整咗30%，呢轉承接住魚缸水向下流，專掘細價股炒嘅時候，加埋渝港出售確利達肥仔獲利，先嚟轉短打，當渝港上番0.160元計 ，現價（0.110元）要升40%，PB仍然得0.6倍，未有耐炒過龍。
錢雋
細價股專家
本欄逢周二、三、五刊出