好多香港人對投資嘅賺蝕情況感到好敏感，友邦香港最近一項調查發現，受訪500人當中，原來逾三成人會隱瞞投資賺蝕情況，近兩成只報喜不報憂。
華華就呢個結果問過財經界人士，「靚媽」中原按揭經紀董事總經理王美鳳認為，講唔講、點樣講都好睇個人性格、投資風格，「我自己只係做低風險投資，同老公之間透明度都好高，絕對唔會隱瞞」。
不過，佢都話知道身邊全職炒股嘅朋友就甚少向另一半提起投資賺蝕：「日日炒，好難如實滙報喎！」
銀行界「靚佬」富邦香港消費金融部主管谷祖明就話，呢項調查應該睇埋年齡因素，佢相信後生仔好勝心較強，傾向同親友分享買咗乜股票，賺咗幾錢。
不過，隨住年齡增長，投資唔再係有趣話題，谷祖明話「大家對賺一萬幾千嘅興趣唔大，加上講咗幾十年，對方都覺得悶啦」。佢承認好少跟屋企人分享投資賺蝕了。