大企業時興邀請名人到訪公司，為員工辦分享會，講下點做生意、點做好呢份工之類，國泰航空（293）上星期四就請到「天王」劉德華到訪機場國泰城，佢少不免要走去參觀模擬駕駛室，聽聽真正機師分享飛行心得，順便扮一扮型仔機師Captain Lau喇。
聽講劉德華唔係行一轉就走，都花咗半日時間，上周四晨早10點，先去國泰貨運站參觀咗一粒鐘，睇晒空運嘅物流程序，佢仲不時好奇問呢樣，問嗰樣，好留心。之後佢就過去國泰城，先同國泰管理層食晏，然後跟國泰員工舉行分享會。
已為人父嘅佢，講到一點，應該好多怪獸家長都有同感。佢話，今天嘅細路唔識得輸，因為家長都為佢哋安排點樣贏，但其實只要接受最壞嘅結果，咁就冇嘢可以難到大家。
佢又爆料話，曾有朋友一直好想認識鍾楚紅，有一日佢終於介紹佢哋認識。後來呢位朋友話番畀佢知，成功咗一半，呢位朋友話：「我終於約咗鍾楚紅，只不過佢冇嚟，所以我成功咗一半！」劉德華係想講，成功取決於自己點睇㗎啫。