減息後，大陸個市熱烈慶賀足一星期，噚日終回吐，滬綜指上個星期大大話話升咗7.9%，噚日只是小回0.1%，升勢格局似乎未有改變。眾所周知，炒內地相關股份，一向要睇阿爺面色做人，政策傾斜股份永遠當炒，被調控板塊通常無運行。內地近年積極推出金融改革，而剛於日前發佈的存保條例徵求意見稿，亦為其一系列金融改革政策之一，根據意見稿，存保上限將設定為50萬元人民幣。股民會解讀為利好銀行股的好消息，因存戶有更大誘因將錢存入銀行。但這只是自由市場下的預期反應，並不應適用於內地市場。
內地改革開放以來，銀行從未擠提或爆煲，唔代表內地監管好，只係央行的保護奇佳，存戶將錢存銀行，中央唔會由得銀行爆煲，存戶在銀行的存款均有官方100%保證。今次在內地存保條例，是將存戶原有保障降低至最多50萬元，存戶風險提高而非降低。金融改革角度，政策推出無可厚非。由於所有金融機構均要為存款投保，大型銀行倒閉風險不高，實際上分擔中小型銀行風險，對中小型銀行吸引存戶相對有利，其競爭力亦相對提高。
流氓