雨傘運動去到今日，見到部份走火入魔嘅警察，不恰當使用武力固然恐怖，但其實最大嘅危機，係來自香港人心態。記得928前，有女學生俾女警拖行、黃之鋒被捕等消息，當時大家反應好大，更激發唔少人上街。不過，自捱過催淚彈、出現暗角打鑊等後，大家都開始出現「荒謬疲勞」。
就好似你買隻股票，跌半成，你好驚，但冇沽；再跌半成，你更驚，但都冇沽，佢陰啲陰啲再跌，開始覺得麻目，跌到一個位，你已覺得沽同唔沽都冇所謂，反正衰到貼地。如果今日，再出現女學生被警察喺地下拖行嘅新聞？你可能會話，「濕濕碎啦，冇打穿佢個頭已經好好。」出旺角俾警察打？「預咗啦。」去到有日，香港人對惡行習以為常，咁香港真係玩完。
講番股票，通常配股上市嘅股，開頭一定大炒特炒。不過上年9月配股上市，晶片製造商晶芯科技（8036），一直喺1蚊左右橫行左成年，去到上月先嚟料。晶芯最吸引之處係有同偉仕（856）成立合營企業，專注智能手機及電腦周邊產品研發、生產及銷售。今年7月，兩公司更加碼注資合營，總額將由5,500萬增至1.15億元，證明兩間公司都認為合營大有作為。11月時公司雖然折讓近18%配股，但只係1,500萬股，只佔經擴大5.68%。加上正如前文所講，橫行咁耐，應該收乾晒貨，經過呢幾日整固後，係時候再向上衝。
Fifi
http://www.facebook.com/lovefrystock
本欄逢周二、四刊出