支聯會前晚改選領導層，外界認定原主席李卓人會當選連任，點知最後卻係另一「仁」、民主黨何俊仁接掌主席，仲要係由李卓人提名，到底阿人搞邊科？八方聽聞，選舉主席時，阿人係有獲當中嘅常委提名競逐連任，但佢除咗覺得自己喺工黨同職工盟都身任要職，自覺兼顧不暇，其實亦驚佢嗰單捐款事件持續被炒作，為免影響支聯會形象，所以覺得另覓「仁」選更好，最終好在有鐵頭仁願意接棒，佢就安心同鐵頭仁對調支聯會嘅工作崗位，轉職秘書繼續為平反六四作戰到底。而佢卸任主席前亦冇偷懶，周日中午喺旺角街站嗌咪，收集市民簽署嘅聖誕卡送寄內地被囚嘅維權人士。