港交所（388）行政總裁李小加仆心仆命終於搞到個滬港通出嚟，可惜雷聲大，雨點小，開通兩個多星期以來，港股通與滬股通每日嘅成交都差強人意，認真始料不及，陰功豬，之前市場仲係咁話，希望滬港通之後，就嚟個深港通。
雖然唔知𠵱家仲有冇人有興趣搞深港通，但係都無礙李小加繼續加強同深圳交易所嘅交流，前日佢就帶隊上深圳，同深交所代表打友誼波嘞。
李小加出名鍾意踢足球，平時都經常落場同班同事踢波，前日帶隊北上與深交所嘅足球隊對壘，佢着住9號球衣，打前鋒位置，踢咗下半場，完場一比一打成平手，不過呢一球就唔關李小加事，唔係由佢踢入龍門嘅。
聞說，李小加鍾意做前鋒，並非想認叻，而係因為做前鋒，最差都係入唔到波，冇做後衞咁大壓力。