佔領運動火紅火熱之際，食物及衞生局局長高永文卻心繫伊波拉，噚日去到鯉魚門公園及度假村，視察由衞生署衞生防護中心舉行代號名為「托帕」嘅跨部門演習。衞生署話呀，噚日嘅實地演習已經係過去五星期內嘅第四次，主要測試相關政府部門喺唔同模擬情況下，運作檢疫中心嘅能力，加強相關持份者對伊波拉嘅準備同應變，呢次演習有超過六十個嚟自唔同政府部門嘅人員參與。
而民望高噚日嘅視察，包括睇埋演習人員喺處理一名模擬出現嘔吐病徵嘅接受檢疫人士，喺指定位置卸除個人防護裝備嘅程序，只見佢全程一副憂戚戚嘅樣，唔通都擔心一如民建聯何俊賢亂噏廿四，佔區會爆發伊波拉？而除咗民望高外，噚日仲有超過廿位嚟自內地同澳門嘅衞生及檢疫部門代表獲邀為觀察員。