深圳上市的A股水產股龍頭獐子島，喺10月突然話，公司嘅扇貝已經全部死晒，損失8億元人民幣，股份停牌至今。
雖然市場普遍相信，公司之前沒有養殖扇貝，但獐子島就用「罕見冷水團凍死所有扇貝」來解畫。不過，有內地媒體揭發，原來喺前幾年，獐子島一直話冷水團令水溫降低，會提高扇貝品質。
同一樣嘢，一時係神一時係鬼，正如內地股市莊家慣用手法，經常將同一條消息包來包去，一時當好消息，一時當壞消息，炒上炒落，令人歎為觀止。
有去街市買過餸都知，海水越凍嘅地方，海產越靚，所以話冷水團令扇貝品質提高，似乎有啲道理。
不過，中科院海洋所講，目前冇法證明冷水團對扇貝養殖的影響，而之前亦從冇冷水團令扇貝大面積死亡嘅案例。更何況的是，獐子島及附近海島居民都表示，從未聽說過冷水團呢樣嘢。
換言之，所謂冷水團，極有可能係獐子島自己發明的概念。之前用嚟唱好，而家用嚟唱淡，視乎需要。只要肯撈番一兩隻扇貝驗屍，就可以輕易篤穿。但謊言可以一直咁維持，就係A股嘅真正問題。
李可強