王宗堯在09年從台灣回流返港，曾經在《喜愛夜蒲》和三級電影《一路向西》大膽演出，今次在《選戰》飾演張癸龍的他，受近期社會環境因素影響，不但令劇集受熱捧，亦令王宗堯受關注。日前他為劇集接受訪問時，坦言未有擔心角色和對白敏感，他說：「今次對我係一個大挑戰，劇本、人物同所有設定環境，係一個虛擬嘅世界，講緊啲政治古仔、政治架構同香港𠵱家環境好相符，我好耐都冇嗰種追劇嘅感覺，以前我都飲嗰啲奶水大，好似《大時代》、《創世紀》，全部都好好睇，但𠵱家啲人好似冇乜生命，可能冇咗競爭太耐，少咗一份用心。」他還說：「雖然我本身唔係港視嘅人，但係陪住佢哋行咗好多路，睇到今次反應咁好，真係開心，你問我一定係值得，因為有個新嘗試。」
灑鹽花令劇情精采
對於與李心潔的一段曖昧關係，王宗堯笑說：「冇特定話佢哋兩個一定要愛情線，始終喺中國人社會，勾二嫂係唔好嘅一件事，喺張癸龍心目中，就算你對呢個人幾有好感，但係唔會畀自己諗咗去嗰一邊。」在第三集的片尾，見到王宗堯在雨中默默跟隨李心潔的步伐，當中李心潔說：「你係咪會一直陪我行落去？」實在觸動不少人，王宗堯說：「我覺得導演同編劇先係最浪漫！」提到劇中的連場情慾戲，他說：「呢啲只係一個鹽花，部劇唔係嗰啲focus，目的只係令劇情更加精采，呢套戲有好多messages，無論喺政治或社會現狀，如果你唔付出，或者冇老謀深算，係行唔到好遠。」
採訪：何慧斯
髮型：Zap Tang＠Private-i
化妝：Kayte Fung
服裝：Salvatore Homme
手錶：TRIARROWS