投鼠忌器！石油輸出國組織上周四決定唔減產托價，避免賠了夫人又折兵，讓美國頁岩油有機可乘，搶走更多生意。財雄勢大嘅沙地阿拉伯擺出副戰鬥格，以本傷人保江山嘅立場堅定，空軍當然得勢不饒人，紐約期油連70蚊亦失守，令油價進入60後年代。
紐約1月期油上周重挫13.5%，收報66.15美元，今年累跌32%，布蘭特期油周跌12.7%，今年來跌近37%。產油國過去得天獨厚，單靠賣油而足已豐衣足食，使慣食慣，家陣油價兵敗如山倒令佢地收入大降，低油價情況若成為常態，處境會相當不妙。
根據《經濟學人》資料，現水平油價下，油組12個成員國當中只有科威特、卡塔爾和阿聯酋能平衡政府預算開支，就算是家底極厚的沙地，亦須要布蘭特期油每桶90美元才能打個和。換言之家陣大部份產油國都要靠食老本，長始下去唔係辦法，難怪中東股神阿爾瓦利德舊年就大聲疾呼，奉勸同胞要減少依賴石油經濟。油組今次乜都唔做，連口術亦懶得出，變相為跌勢開綠燈，加上擺明打減價戰逼美國佬收皮，油市幾時先見底好難估。
受累油價跌勢，商品貨幣上周亦四腳朝天，澳洲央行副行長踩多腳話不排除再減息，澳元上周跌到逾四年低位，低見84.85美仙。低油價對加拿大油沙產業構成壓力，加元上周跌到1.1445兌1美元，貼近月中的逾五年低位。
奇兵
本欄逢周一刊出