周大福（1929）10月底事先張揚，話上星期五喺上海慶祝85歲生日時，會拎佢哋買咗好耐嗰粒104卡超級巨鑽出嚟展示，點知說好的巨鑽最終甩底。
周大福董事總經理黃紹基（Kent）解釋，話粒巨鑽臨時決定要再「加多啲嘢」，加上今次周年晚會已經展出十幾件珠寶設計同珍藏，怕如果拎埋粒巨鑽出嚟，太搶鏡，所以決定再擇日。
周大福早喺2010年用2.75億元投得巨型鑽胚「庫里南遺產」，逾500卡嘅鑽胚最後切割成24粒，其中最大粒嘅「庫里南遺產1號」達104卡，係世界最大圓形切割鑽石。
聞說，呢一家大細24粒鑽石，原本請咗一名世界級設計師，打算製作成一件首飾來展出。臨時甩底，唔通計劃有變？
雖然未有得睇巨鑽，但周大福都好有心，搵緊地方開設「周大福博物館」，應該都係好想將收藏品公諸同好，畀大家望下都好。不過暫時未知地點，亦未知幾時落實。