一年一度「香港經濟峯會」今日舉行，焦點之一係財經專欄作家曹仁超（曹Sir）第二次成功抗癌後，首次正式公開演講。不過曹Sir噚日話，佢只會上台以多人座談形式講10至15分鐘，係咪講股票、大派貼士都係「未必㗎」，又強調自己大病初癒，唔想做主角，希望大家將焦點放係其他人身上喎。
曹Sir第一次成功抗癌後，舊年底都曾經以消瘦形象出席呢個經濟峯會，仲預測恒指可以升上31000點。佢今年農曆新年後發現再患癌後，一度淡出財經界，好在早前已經病癒，𠵱家可以再健健康康現身同一個場合。
其實曹Sir唔做焦點，今日都有唔少猛人現身，喺美國上市冇耐嘅阿里巴巴，派出首席營運官張勇出席，仲有日日俾人追問滬港通嘅港交所（388）行政總裁李小加同主席周松崗，金管局總裁陳德霖亦會到。