原本係駐港英軍總司令官邸嘅「旗杆屋」，30多年前喺時任市政局議員嘅「維他奶之父」羅桂祥爭取下，活化成茶具文物館。適逢茶具文物館30周年紀念，展館特別舉辦「從豆奶到普洱」展覽，將多達80幾套精選茶具以及唔同年代嘅維他奶樽，crossover同場展出。
茶具精品中包括明代名家時大彬製作嘅「蓮瓣僧帽壺」。壺蓋上面有六塊蓮瓣，似足《西遊記》唐三藏嘅僧帽。清末名家邵大亨製作嘅「魚化龍壺」，概念則嚟自「鯉躍龍門」；特別之處係喺壺鈕上嘅龍頭裝飾：一倒茶就會郁，再倒茶更會伸出龍舌，好鬼特別。
講到八方至like係一個黃綠相襯嘅「巧色芒果壺」，外形十足十食得嘅芒果。原來呢隻壺出自20世紀後期七大工藝師、女造壺師蔣蓉之手。點解向來褐赤色嘅紫砂茶壺會咁鮮色？原來混合唔同嘅紫砂泥，喺燒製時產生化學作用，會混出嘅新顏色。