韋達近排雖然枕住有馬贏，但都係一W就收工，已經整整一個月冇起過孖。呢日佢卒之威番次，第二場贏完大熱門呂廐「英明神勇」，第七場一班1600米爆冷贏葉廐「隨心隨意」捧走其士盃，重溫久違嘅起孖滋味。
「隨心隨意」上季失落同一項賽事只跑第三，今季以同一配搭贏馬補數，馬主陳穎怡有馬場王菀之之稱，這匹前季最佳新馬，取得久違的勝利，都算苦盡甘來。跑第二係蔡廐已入選下個月香港瓶之「桃花心」，田泰安繼續有貨交，Q派近一千蚊。反為潘頓贏開由雷神接手之灰色神獸「和順超影」增程卻未能連捷，早段雷神力扣座騎，唔畀佢上前，直路初仍不力推，到直路中後段才開鞭，此時馬兒卻反應一般，1.4倍大熱門僅得第三，冇咗上仗贏千四米嗰種霸氣，傷透馬迷心。李嘉欣之「貳寶」得梗頸四。
「隨心隨意」前季出道六戰五冠一亞，上季冇贏過，表現失色，三月中跑完提早歇暑，上個月喺二班千四米復出跑尾四，輸畀頭馬「和順超影」六個半馬位，今場轉跑未贏過之千六米留前鬥後，末段從大外欄一衝過晒，韋達成條直路齋推冇開過鞭，「隨心隨意」有番昔日嘅朝氣，爆20倍冷W揚威其士盃。
「隨心隨意」馬主陳穎怡的父親陳佛恩說：「賽前葉楚航對我們說，『隨心隨意』上季狀態回落，以致整季未能交出應有表現，今季重整旗鼓，狀態已回正軌；今場賽前休息足夠，胃口很好，做了許多備戰工夫，勇況起得令他很滿意，雖然今場有不少對手，但葉楚航說跑馬冇絕對，可能可帶來驚喜，我很開心『隨心隨意』果然帶來驚喜，至於未來部署，留待練馬師揸主意。」