騎士上周六主場對住由成班老弱傷殘支撐嘅溜馬，有今夏新加盟嘅「數據王」路夫（Kevin Love）射入個人今季新高嘅28分，以109:97輕鬆贏波，經歷前排4連敗嘅小低潮之後，球隊已經連贏3場。
路夫今季過檔騎士，夾勒邦占士同K艾榮做隊友，一路只係屈居「3弟」，以前喺木狼刷嘅靚數據已經一去不復還。未計今場，路夫喺新球季打咗14場波，平均每場入得16.5分；但佢今場一開波就着晒火，頭4次起手全中，第1節已經入咗16分，全場就交出28分同10籃板。
大帝疑傷手分波都掂
路夫賽後話感覺良好：「我唔會話呢場係大突破，不過我今場波好有效率，尤其喺第1節。」「大佬」占士亦對佢表示讚賞：「佢今晚打得好好，令班隊友成場波都打得好輕鬆。」占士自己喺第3節一次射波後被撞倒地，疑似整傷咗左手，但佢之後繼續比賽，應該冇咩大礙。
至於K艾榮今場同樣造出「雙雙」，貢獻24分之餘，搶到10個籃板亦平咗個人紀錄。占士嘅數據雖然冇咁靚，得19分同7助攻，但享受分波角色嘅佢亦有亮點；見球隊開波冇耐就打得咁順，占士就表演精采助攻，一路揚手指揮馬利安走位接波，突然交咗個no look pass畀中間嘅K艾榮。馬利安俾佢fake到幾乎想鏟入籃底接應，好彩及時收步；而K艾榮就梗係不負大佬所望，輕鬆上籃得分啦。
識睇，一定係睇足英台【英波Live】：
http://soccer.appledaily.com
http://bit.ly/engballlive