沙田1000米直路賽係初出馬樂園，事關跑落唔使轉彎，未有出賽經驗嘅年稚馬，相對較易適應，過往有唔少馬匹初出即贏直路賽嘅例子。而呢日第四場四班一千米，全場初出馬只得蔡約翰馬房之「鄉村輝煌」，配今季表現大跌Watt之田泰安冇乜人信，冷到46倍開跑，機會被馬迷睇淡。不過呢匹蔡廐馬卻如有神助般，拉士喺外欄一望空，三兩個箭步已經脫穎而出，收韁贏三個多身位，姿態好誇張，成為蔡廐今季暫時最冷頭馬，亦幫田泰安取得今季第四W，令安仔舒緩咗近期飽受批評之壓力。
至於「善喜」由雷神殺入一席Q腳，呂廐頭四場出三駒兩冠一亞全入Q，第三名「勁優秀」。今場東廐大熱門「紅旗福將」換上蔡明紹，竟然由龍變蟲嚴重走樣，跑到半程已經收慢，幾乎拉停過終點咁滯，結果包尾輸10個馬位。
「鄉村」系以往支持告仔，喺東廐出過「鄉村樂韻」呢匹五捷馬。近年馬主改同其他馬房合作，其中由賀賢訓練之「鄉村活力」亦試過爆冷贏直路賽。