廖偉雄「燦神回歸演笑會七太救地球」下月2號起一連三日在九展演出，噚日燦神專登喺廣州返港，聯同監製黎文卓同有份表演嘅朱紫嬈喺尖沙嘴宣傳，三人重演當年燦神食漢堡飽經典畫面，不過今次就換上豬柳蛋漢堡，意境同當時有啲分別喎。
魔術師叫錯乜太
之前廖偉雄被霸道大台以版權問題禁止佢再叫乜太，噚日有位魔術師表演時口快快稱呼燦神乜太，黎文卓即好緊張咁話：「唔能夠叫乜太，係七太。」而大台保持一貫小器作風，冇派人去採訪活動，免得幫燦神宣傳，燦神心平氣和話：「冇乜所謂，佢哋都唔係經常嚟，你哋有嚟咪得囉，咁多人。」燦神話佢自己都尊重版權，個騷唔會提及乜太。海報上有字眼寫明會爆大鑊，燦神聞言即封嘴，唔想咁快露口風。
撰文：馮仁昭