早排本欄引述美國億萬大富豪彭博之言，佢勸美國年輕人與其借到一身債去讀普通大學，攞普通非專業學位，畢業出到嚟又搵唔到工嘅話，不如索性做學師仔，做水喉匠好過。
當然彭博之言有其美國社會背景：（一）美國大學多得很，中學畢業生要入大學，並非好困難；（二）美國大學起碼可分一級、二級、三級，入一級大學如哈佛、耶魯當然好難，但入三級大學如甚麼州立大學之類，就容易好多，如果在呢啲大學讀文學士，新聞學學士等學位，在今天的美國，確實好難搵工；（三）CNN早有報導，美國的士司機中持有大學學位的，比例不斷增加；（四）美國入大學嘅學生，大部份不能倚賴家庭支持，要靠半工讀，借學生貸款（student loan），讀書時辛苦，畢業後孭周身債。正因如此，彭博先至叫一啲年輕人腳踏實地，老早就學習一技之長，做水喉匠當然只係一個例子。
呢日午飯時碰到一位職業培訓專家，佢話香港有一位工業家曾有類似彭博先生嘅言論，呢位工業家又講得幾貼近現實噃，佢留意到在一個公屋屋邨，一位屋邨醫生，讀大學醫學院（尖子先至入得到），做實習醫生，考專科（家庭醫學）資格，加加埋成十三四年，在屋邨睇病，大概收費二百幾至三百蚊，包埋藥。但在同一屋邨，是但叫一個水喉匠、鋁窗師傅、電工上門睇一睇，做一啲簡單修理，已要收費三至五百，而且並非一叫就到，往往要預約㖭。故此呢位工業家對一啲讀書成績好麻麻，DSE成績入唔到大學嘅學生講：「你地不如去學師做工匠啦，呢啲工唔會outsource（外判）咗去印度、菲律賓、中國大陸㗎！」
學師做工匠係德國工業界傳統，至今仍然係社會結構一部份，做到內閣部長嘅，有博士，有從學徒成為技師嘅專才，美國奧巴馬話要向德國制度學習。香港社會素來重文輕武（即以前做寫字樓嘅叫做先生，在工廠嘅就係勞工），家長普遍希望子女他日坐在冷氣間內打工，不要揸住工具擔擔抬抬。聽聞職業訓練局（VTC）會推出一個Learn & Earn嘅計畫，學生既上堂又去店舖實習攞人工，邊學邊做，邊做邊學，希望有學生肯制啦。食完飯返到公司，電鎖竟然失靈入唔到門，急call外出同事趕回來用鎖匙開門。秘書搵咗一個電鎖師傅上門修理，師傅唔夠十分鐘就上到嚟，睇一睇，就話：「係跳fuse啫，我唔識整，你應該搵電工。係咁意收番上門費一百蚊。」唯有照俾啦！