今期周日(30日)賽事，重頭戲當然係一班1600米其士盃，個個都話呢場好簡單，灰色神獸「和順超影」多數贏梗，事關上仗贏馬走勢實在太驚人。其實除咗「和順超影」，今場有隻馬上仗嘅走勢，亦好得人驚，不過就唔係贏馬，而係應贏變輸。
所講嘅係李嘉欣隻「貳寶」，上場排14檔已經好蝕底，騎師柏寶唔知搞乜，轉彎好似發狂咁，將「貳寶」飛到出大外欄外父咁外，蝕位蝕到阿媽都唔記得，一般嚟講咁嘅走位，多數都大敗，但「貳寶」居然仲有餘力衝刺，臨尾勁到飛起，狂追得季軍，只輸畀頭馬「包裝鬥士」半身位。唉，如果唔係蝕咗咁多腳程，起碼都贏一兩個馬位啦，你話係咪好唔抵先？
日前嘉欣另一愛駒「一寶」等馬會短途錦標，當日嘉欣同亨亨拍拖入場，原來係嘉欣結婚六周年紀念，嘉欣話明希望贏馬慶祝，可惜「一寶」輸咗冇表現。不過今期有「貳寶」接捧，今場出馬少少，估計柏寶走位唔會再外父咁外，隻馬先得五歲，仲有進步空間，話唔定嘉欣可以收復失地，憑「貳寶」補祝結婚六周年紀念。