呢排大家興起去旺角購物，其實多少係「大懷舊」箒。查實一班老餅，包括我仲係麻甩仔嘅時候，邊個買嘢唔落旺角兜幾轉先安樂㗎。
廿幾年前嘅旺角，同𠵱家一樣咁旺。中學母校位於何文田，最優越就係放學可以流連旺角，正所謂「開心睇鞋，唔開心又睇鞋」，喺波鞋街逐間舖行，係放學後嘅指定動作，同一款鞋，格到最抵價；但當你諗住action時，sales姐姐一句就打爆你個如意算盤：「冇你個size喎！」死死氣又兜幾個圈，另一間有size冇特價，焗住買啦。哈，sales哥哥就施施然打電話call隔籬舖攞貨，一分鐘後貨到，而送貨姐姐就係話畀我知冇size嗰位。
由卡式帶到唱片到CD到DVD，大家喺旺角當然買唔少，雖然都係越買越少。不過我最深印象嘅，係位處信和地庫某陰暗角落嘅一間舖──當年冇YouTube，呢位店主賣嘅係自己用VHS同錄音帶私人珍藏嘅歌星片段。玩法係你想要邊年邊日邊個電視節目，佢就搵返嚟幫你過落另一餅VHS度；店主亦會自製唔同歌手嘅精華，一餅VHS入面可以儲齊某位歌手過去幾年嘅電視片段，喺當時真係功德無量㗎，印象中連80年代電視台嘅世界盃節目都有。我就試過喺佢嗰度買咗隻市面冇得賣嘅VCD，係哥哥第一次紅館演唱會，一路睇一路回味，此刻無價！不過，我諗佢啲片段真係過來過去有幾百次，質素麻麻。
旺角食lunch不嬲貴啲，但就有種「書友仔出城」嘅感受，當年一個月總會儲夠錢食番餐「金牌」或者「金鳳」，八個半食五味，餐湯餐包餐飯餐飲仲有杯三色雪糕㖭；不過學生哥要留意返，五味係一次過上晒枱，唔想杯雪糕溶就要食快兩啖飯，通常10分鐘可以交枱畀下圍。 我唔多砌模型，所以去親模型舖都係醉翁之意，借啲意就去埋邊睇日本啱啱興起嘅寫真集，不過只係得封面睇，隔籬漫畫店啲漫畫一樣黏實晒慌死蝕底。最大方反而係賣外國雜誌嘅舖仔，台語系日語系同美語系都有，啱啱出嚟做運動呢行嗰陣，睇雜誌收料真係幫到手；但佢哋有個共同點，就係執得好快！
旺角，以前好多獨特嘢賣，由樓上賣波衫到成個商場都係做影印，以至四樓賣四仔，都係「此舖只應旺角有」。家陣好多舖頭都已經唔見咗，轉咗賣乜？就真係要出去行吓先知嘞！
KEYMAN
節目主持
mailto:[email protected]