【本報訊】路邊放着摺枱圓凳，街坊來了，或站或坐。這裏是街坊聚腳點，一罐啤酒一支煙，吹吹水，消磨一個晚上。那管身處旺角佔領區風眼，仍氣定神閒，由討論孫仔應否佔旺，到六七暴動話當年，口水花四濺。滿頭白髮、掉剩一隻門牙的權記辦館老闆周溢，豁達地說：「呢度好似祠堂，放工路過，食飽飯落嚟，就喺呢度傾吓講吓，𠵱家祠堂都拆埋，唔捨得都冇辦法，天下無不散嘅筵席。」
記者：呂麗嬋
上海街權記1965年開業，是區內碩果僅存的辦館。「嗰個年代，冇乜學識又想做小生意，一定開士多，汽水零食餅乾，一買一賣，賺個差價，起碼可以養妻活兒」。周溢有九兄弟姊妹，是家中老大，老爸創業，原本做抹車仔的他，因與書無緣，順理成章回家幫手。
由蚊型士多做到兼賣高檔洋貨洋酒的辦館；見證六七暴動，還有席捲全港的雨傘運動，一做50年。「早兩晚清場，啲人由砵蘭街撤到上海街，坐晒喺舖頭對面，前面就係防暴警察。冇話驚唔驚，拉一陣閘，之後咪照做生意囉」。旺角向來龍蛇混雜，守着小店坐看風雲變幻，周伯笑言沒啥好怕。只因開業不久，就遇上宵禁，兵來將擋，「港式執生」，世事都給他看透了，「六七年，全港宵禁，彌敦道一片死寂，恐怖過𠵱家。當年一出街，就拉你去坐監，法庭都唔使上！」
無論是當年左派口中的反殖，還是一般人眼中的暴動，大亂過後，周伯記得，當年的殖民地政府辦「香港節」以示歌舞昇平，又開始搞社會福利；據稱特區政府想請市民免費坐中環摩天輪，小恩小惠圖安撫民心，歷史也如輪迴，似曾相識。
「從未聽過有人乘機搶嘢」
71歲的周伯說自己目不識丁，搞不清，弄不明，唯一可肯定的，是沒有人趁火打劫。「撇開誰是誰非，八十年代的士大罷工引發暴動，有人搶咗啲魚翅嚟我舖頭兜售。今次佔領，搞咗兩個幾月，從未聽過有人乘機搶嘢」。
前面看不清，緬懷舊日子，周溢說：「以前上海街好風光，洋服店小金舖，旺過女人街。」物換星移，彌敦道變金舖街，上海街的士多都消失了，變成「總有一間喺左近」的便利店和連鎖超市，而權記當年那幅張燈結彩慶祝「升呢」做辦館的黑白威水老照片，也早褪了色。
「收入唔夠交租，咪將舖位劏開，分租出去頂住先。到上個月，業主話轉手，租金翻幾番，做唔到落去，咪結業囉」。就像無數敵不過發展的老舖故事，總嚷着結業後轉行送外賣做到老的周溢，子姪眾多，辦館今日結業。過去一周，晚上6時過後，總擠滿來到一聚的兒孫和老街坊，七嘴八舌插科打諢，沖淡了離愁。
街坊不捨「冇咗個聚腳點」
「喂！冇牙佬，做到幾時箒？」住在對面的大哥明買完餸，路過又來「吹水」，「解穢酒就冇嘞，入嚟瞻仰吓遺容啦」。「我哋以前成日去得如飲茶，由旺場飲到執笠，識咗幾十年」。兩個大男人，你一言我一語，「冇句好話」。旁邊遠道而來「探班」的六妹推波助瀾道：「不如攬吓先啦，講咁多。」豪氣大哥明聞言一面靦腆，邊說邊退後。兩個大男人，揮揮手，盡在不言中。
周伯說：「真係唔捨得，冇咗個聚腳點，但冇辦法，鬥唔過大商場呀。」清場過後，彌敦道的氣氛仍然劍拔弩張。一街之隔的權記，這夜卻洋溢溫情。「咩絲帶都好，點都要停低，買罐汽水食支煙唞吓。其實好多貨都賣得七七八八，冇乜嘢可以賣。但過嚟吹吓水，請你食支煙又點話」。甩剩一隻門牙的周伯，張嘴大笑。