近日，旺角清場，路通，有一男子笑騎騎叫市民去受影響嘅佔領區消費，全民收到。可惜，旺角都係金舖或者賣化妝品同手錶，我等賤民何來高攀；惟有搵啲可負擔嘅過手癮，順道支持商戶。好彩，我哋仲有條波鞋街。
相信體育版讀者都蒲過吓花園街，而此街喺旅遊書亦已「起朵」──幾十幢唐樓之下，再連樓上貨倉，竟然如此「就腳」，都算係「鞋業界築地」。難怪大陸客一定要拖篋嚟掃，可能，就係貪波鞋街一對李寧牌或其他國產牌子都冇。對於經常話「東江水同糧食都係大陸施捨畀香港」嘅陸客，我哋可以回一句「冇我哋香港波鞋，你只可以喺大陸買一萬銀對Air姚明，仲要係假嘅」。
好奇怪，特首又叫人去鳩嗚，警察又叫市民唔好去阻住條街；惟有盡量配合兩邊，即使佢哋從來未配合過我哋。首先，大家去旺角買波鞋，一定會行足幾十間睇款，警察見你四圍走又唔買嘢，就會覺得你係滋事分子；如果佢上前問你做乜，你可以用普通話答佢，又或者掛條藍絲帶出嚟，就會冇事。另外，你要研究好買波鞋嘅路線，如果喺附近交通燈來回走動，你隨時會被扑濕（如果唔好彩遇着個準備退休嘅警司，就真係冇仇報）。買波衫要避免買黃色；落雨都千祈唔好擔遮。你要知道清兵嘅內心係好脆弱嘅，只要觸動到佢哋神經，你就有麻煩。仲有，如果不幸跌錢，無論面額幾大，都一定唔可以執。祝體育用品商戶生意興隆。
梁栢堅
填詞人+彩池人