曾做模特兒，卻喜歡影人多過被影；修讀時尚攝影，卻寧願在陽盛陰衰、粗口橫飛的片場打滾，由電影《桃姐》到《紅van》，以圖像紀錄光影。新近，小妮子就選擇出走，由南美到南極，來到世界盡頭，以她熟悉的光影，紀錄她與新婚丈夫在五千米高原下迷路，以及為影草泥馬受傷的難忘點滴，「對世界，保持好奇心，好重要。」邊走邊看，由虛擬的片場，到真實的旅程；由旺角紅Van到世界盡頭，一樣驚喜不絕，她是港產劇照師李詩卉(Sharon Salad)。
記者 呂麗嬋 攝影 陳奕釗
有理由相信，十年前的模特兒，時興將兩個英文字，堆砌成自己個名。例子包括港男女神Angela Baby，當年同期出道、被視作好姐妹的Salad，就笑指這種改名風潮，源自不甘平凡，「Sharon呢個名太普通，中學時我個花名叫沙律，咪索性叫自己Sharon Salad。」小妮子行年25，家中獨生女，做甚麼都比人快。16歲出道做嫰模，24歲與拍拖半年的男友閃婚；為《桃姐》拍劇照時，才不過22歲，愛看電影的大二女生。
「嗰時仲喺英國讀書，識得木星，佢係行內好出名嘅劇照師，知我愛影相，就同我講，話許鞍華導演會開拍套新戲，叫我試吓。我當時咩經驗都無，將之前去老人院做義工啲相電郵過去，點知撞正套戲講劉德華同桃姐嘅感情，一拍即合。」遇上不介意起用新人的大導，她自知這個機會千載萬逢，瞞著在港的父母，先斬後奏簽約。「最初屋企人好反對，好在後來知道劉德華有份做，先無咁嬲。」她大笑。
夢工場相信奇蹟，Salad也信，「邊學邊做，電影要現場收音，我連隔音箱都無就要趕住開工，外國郵購唔切，唯有臨急上網揾人山寨式自製一個，好狼狽。」片場陽盛陰衰，嬌滴滴不足一百磅的Salad，拿著三十磅重連隔音箱的巨型相機一樣無特權，試過走錯位入鏡；又因為經驗不足，誤著白色衫開工，做了人形反光板被「問候」。
「唯有喺錯誤中學習。」幸好，她遇到的，都是信任年輕人的「大人」，《桃姐》環掃影展，連帶她的處女作也受注視，不少導演向她招手，當中包括出名愛用新人的導演陳果，「對比《桃姐》，紅Van要走鬼拍，難度高，仲日夜顛倒，但阿果係一個好好玩嘅人，跟住佢，學識點樣用最少嘅資源執生。」剎科的一場紅雨戲，最難忘，「紅色顏料照頭淋，又要護住部相機，由頭到腳，連對綠色行山鞋都染紅。」
辛苦萬分，但Salad直言，夢工場的滿足感，並不能單以錢衡量，「任何機會，對我嚟講都好難得，我係新人，一定要更努力，如果唔係，無人會再揾你。」早上九時的通告，她總比其他人早到；不是演員，卻一樣熟讀劇本，先了解劇情，「我哋呢行，收入唔穩定，唯有好景時密密做多啲。」趁開戲前的空檔，她就自資出版攝影集《60 Days: Odyssey to the end of the world》，又計畫到台灣籌備名為花的展覽。「現實同理想有距離，唯有諗吓，點樣拉近少少。」清淡沙律，不比肉香，卻一樣可以七彩繽紛，沙律如是說。