大集團企業董事K在中國會請財經專欄作家吃飯，未夠一點，眾人紛紛起身告辭，連生炒糯米飯都唔得閒食，事關下午一時大市開工，人人要返去公司坐定定也。董事K話佔中運動拖落去不知如何收科，學生似已筋疲力盡，部份學生心裏希望警方清場，等佢地可以返屋企，但警方又要服從政治指示，按兵不動，一於要拖垮學生為止。如此場面，世間罕見，左丁山早在十月六日本欄講「政府拉布拖垮佔中」，引古文「鄭伯克段于鄢」故事（內有好古老之現代常用辭語：多行不義必自斃，及不到黃泉無相見），指梁振英嘅拖延戰術會對佔中運動構成巨大壓力。
個半月之後，現實果然如此，十月十三日本欄講「陳日君之言」，指學生應該聽一聽老主教嘅說話，見好就收：主動撤退。但學生唔聽，就是拖到今日師老兵疲，士氣渙散，被激進派滲透之局面。
唔講政治咯，財經飯局，最緊要講錢。董事K話佢地集團旗下酒店嘅餐飲生意反為好咗，可能係佢地在金鐘旺角冇酒店，地區人士唔去金鐘、旺角，留區消費，反為益咗佢地；集團賣樓亦好旺，去得快，價錢亦好，如果有人問佢：「佔中對其集團生意有無影響？」佢會話：「負面影響見唔到。」但對金鐘、彌敦道嘅店舖呢？大概只能寄予同情。
董事K管理嘅投資，遍及歐洲、澳洲、紐西蘭與加拿大，佢話生意回報甚佳，因當地人守法守規矩，政府守合約精神，收購當地企業前，談判得好詳細，辛苦，但係簽咗收購協議之後，就唔會有人用不同理由去挑骨頭。原來佢地連堆填區都有經營，由回收垃圾（收費），堆填垃圾（收費），焚化垃圾（收費），已是收費一條龍，搞到整個過程既環保又賺錢兼冇人有異議。左丁山笑佢話：「不如叫黃錦星搵你做三堆一爐顧問。」董事K連忙擰擰頭：「香港啲嘢自然有政府及專家打理。」唉，打理過鬼咩，現時嘅特區政府應付政治抗議就一流，實際管治就九流，搞到人人有怨氣，個個不服氣，於是各師各法，乜都反對咗先至講，令到大家乜都唔做得，形成管治發展僵局，如果有人移民或因如此。羅范椒芬引用友人之言，話有人移民係因為怕咗班示威學生，都幾好笑。呢類移民最好移去北京或新加坡，咁就唔會聽到有學生大示威嘞。