近年專做翻唱發燒碟的胡琳，本是大名娛樂旗下歌手，數月前卻跟公司解約了，好在經理人公司多年來都力撐她，令胡琳不致變孤兒仔，仍然可以繼續出碟夢，只要有人真金白銀買她的唱片及演唱會飛，就算做不到最受歡迎女歌星，胡琳仍樂觀說：「我覺得自己好成功！」
撰文：余燕儀
入行8年的胡琳一直堅持唱Jazz和R&B，又捨得揼錢到紐約多間著名學院修讀演藝、聲樂、舞蹈及國際拉丁舞課程，雖然不斷努力向上游，卻依然被偶像主導的市場所忽視，胡琳有感而發說：「可能大家對我印象，只係出碟時會出現一下，跟住過一排又靜番，大家唔知我匿埋咗去邊，我做嘅音樂未必係香港聽眾覺得好主流，大家覺得Jazz同自己生活冇乜關係，或者有人鍾意聽K歌多啲，未聽就已經唔畀機會我。」
唱得又跳得的胡琳卻紅不起，有否覺得自己懷才不遇？她笑說：「完全冇呢種感覺，歌迷真金白銀買唱片或睇演唱會，嗰刻令我好開心，我其實好成功，就算唔係最受歡迎女歌星，我講真㗎，本身個人好樂觀，成功喺每人心目中標準唔同，對我嚟講，可以做到鍾意嘅嘢就係成功，如果過咗10年、50年之後，攞番自己啲碟出嚟，除咗我當係瑰寶之外，有一班人曾經聽過呢啲歌，甚至乎以後都聽緊呢啲歌，畀我好大鼓勵。」
冇嘢做情緒低落
在紐約進修、美國錄音的胡琳，似乎付出與收穫不成正比，胡琳卻說：「我覺得好幸運，喺紐約學音樂，嚟香港做咗兩個音樂劇，有時唔係學咗就有用途，當時會揀以Jazz為音樂基礎，因為喺紐約讀書可以接觸Jazz，學以致用都得到好大收穫，如果做嘅嘢完全冇自己風格，好盲目去跟隨市場，所謂好主流嘅嘢，我唔相信會有今日成績。雖然灰心一定有，我發覺情緒低落，通常都係嗰排冇乜嘢做，雖然自己鍾意唱歌，但人生係咪仲有其他嘢可以做呢？但係……我做唔到第二樣嘢，雖然由細到大興趣幾廣闊，跳舞、畫畫、唱歌，以前仲學過氣功，但所有興趣都係三分鐘熱度，唱歌係我堅持得最耐，深信係上天安排我去做，我一定會堅持落去。」
「我冇畀錢出碟」
不過，數月前胡琳卻跟大名娛樂解約，失去唱片公司支持的她說：「自己出道以嚟都係同一間經理人公司，中間同兩間唱片公司合作：bma、大名娛樂，兩間公司合作都有得着，學到好多嘢，我同大名合作差唔多一年，開頭做碟好開心，但後來大家理念方向唔同，所以和平分手，慶幸冇擺雪櫃幾年同要我賠錢。」未簽到新公司的胡琳，新碟惟有由經理人公司推出，她說：「新碟年中錄好，唔想拖慢速度，有時隔太耐唔出歌，真係以為你去咗開花店。我要澄清，好多人以為我好有錢，屋企有唔有錢我唔知，只係好一般家庭，但我冇畀錢出碟，開頭有少少唔開心，大家好似永遠覺得我畀錢出碟，唔係有人投資我興趣，到後來解唔解釋唔重要，碟有質素最重要。」
近年改出發燒碟的胡琳，強調並不是貪發燒碟有市場，她說：「其實出普通碟都係一樣銷量，實數有萬幾二萬，自己最差隻碟都有八千至一萬銷量，做騷都可以賺到錢，雖然唔使家人資助，但我冇畀家用，當然希望經濟可以更加好。大家入行都有一個夢想，我夢想咪唱歌，如果唔鍾意發夢，唔會做同藝術有關，我仍然想繼續做，但唔會話做到七十歲，太誇。」
場地：RedMR紅人派對
有米經理人一路扶持
賣聲的胡琳自知外表不算靚女，本來下巴有一粒癦的她，年前更脫癦求出路，不過有網友卻覺得她有癦仲正。感情方面，胡琳與有米經理人的緋聞傳足多年，甚至傳經理人為𠱁女友揼錢捧她做歌手，胡琳強調：「佢係有錢嘅，但佢真係唔係我男友。」
胡琳為撇甩緋聞，不惜開經理人玩笑：「不過佢唔係基，雖然佢鍾意着粉紅色衫。其實朋友都問係咪呢個原因，之前一直冇男仔敢埋身，我都唔知！」問會否為甩身公開另一半？她說：「冇理由一拍拖就周圍講，萬一甩咗咪辳爆，同埋唔好畀壓力人哋。」
