政務司司長林鄭月娥噚日傍晚現身香港知專設計學院嘅活動，八方事前心諗，林鄭唔怕咁多年輕人嘅地方咩？點知林鄭留咗喺知專成個鐘咁滯，除咗間中聽到一、兩句不知從何傳來嘅「我要真普選」口號外，示威區一個人都冇，成個活動順利得出乎意料。
就係八方以為成件事相當「河蟹」之際，突然收到熱心人報料話，其實成個活動暗藏玄機。話說活動場地除咗有一大塊以黃色為主色嘅佈景板外，紅色地毯下面原來收埋咗一大塊黃地毯！事關熱心人話知專高層都撐黃絲帶，點知黃佈景加黃地毯件事被職訓局高層知道後，下令由黃轉紅，熱心人仲提供埋紅冚黃嘅相做證明。若然屬實的話林鄭呢次真係中伏，成場企咗喺黃地毯上面都唔知。