呢排港足真係開咗全速快車咁，一個星期打足幾日比賽，搞到我哋呢啲有職務嘅人真係氣都無時間唞。星期三喺旺角睇完場榜首大戰，見到少林寺打鼓個光頭仔面燶燶就多嘴問吓佢咩事，佢話唔講私人嘢住。
先過兩場好料畀我先，佢話歐洲兩大聯賽各有場必大波，我話咩料，佢話德國嗰邊先有今晚第23場，哈化柏林對拜仁慕尼黑（圖）入球「大」，雖然開到3.5球，但有2.05倍好分，拜仁周中歐聯輸波返國一定反彈，而且近8場比賽有6場開大，對倒數3次作客哈化都大，前鋒羅拔利雲度夫斯基同梅拿狀態好到不得了，唔大冇天理喇！
另外星期日第14場修咸頓對曼城2.5球「大」有1.8，乘埋有3.69倍正喎。曼城歐聯保住出線機會士氣大振，近5場作客全「大」加上阿古路近5場入6球，除非個天同佢作對，咁冇天理就輸死都抵咁話。
我見佢成晚講幾次冇天理就問佢咩事。佢搖搖頭咁話：「領隊，你有所不知，我捧少林寺大大話話都由細捧到大，近幾年抬住個大鼓由南區打到元朗，有時仲用埋份糧買機票飛埋出國外為佢哋打氣，點知最近波總要影海報，搵個忠實球迷加個球員然後擺喺地鐵宣傳港超，結果會方搵咗貴人個仔，都唔畀個機會我呢啲忠實擁躉，真係心都淡埋！」我聽完都唔知點安慰佢，但光頭仔你又係嘅，新官上場，你好似排頭出嚟作反，球會點會搵你哋呢啲搞事分子，都係唔好咁上心囉！
文：本地職業領隊
識睇，一定係睇足英台【英波Live】：
http://soccer.appledaily.com
http://bit.ly/engballlive