【本報訊】城中一名富豪近排喺國際拍賣場風頭好勁，上禮拜一擲2.546億元喺紐約蘇富比，以逾底價兩倍買咗一顆9.75卡鮮彩藍鑽，取名「The Zoe Diamond」；早幾日周二又以超過兩倍底價，以6,508萬喺香港佳士得拍賣會買粒緬甸紅寶石，取名「Zoe Red」，買家話用個女英文名命名。
一個禮拜豪花3.1億
唔夠一個禮拜豪花3.1億買粒藍鑽同紅寶𠱁個女開心，珠寶業界消息話，買家係人稱「大劉」的劉鑾雄。
佳士得話，呢粒「Zoe Red」係由Cartier設計既10.1卡枕形緬甸天然紅寶石連鑽石胸針，周二（25日）拍賣，底價2,000萬元，競爭好鬼激烈，經過多輪叫價終以6,508萬成交，係今次佳士得珠寶秋季拍賣最高金額。買家話粒紅寶用個女英文名稱Zoe命名。
據了解，買家係對鑽飾情有獨鍾既劉鑾雄。上周喺紐約蘇富比以2.546億元投咗一粒9.75卡鮮彩藍鑽，命名「The Zoe Diamond」，刷新藍鑽世界拍賣紀錄同任何鑽石每卡單位價世界紀錄，買家都係大劉。大劉早喺09年日內瓦蘇富比以7,400萬元購得7.03卡藍鑽，命名「Star of Josephine」送畀囡囡。