啱啱過咗嘅星期四係感恩節，作為美國一年一度嘅重要節日，NBA就特登休戰一日，等各位球星可以同至愛親朋開開心心咁過番晚。
大帝食滯 拜恩甜蜜
感恩節係美國傳統家庭聚會嘅好日子，勒邦占士一家就去咗外父外母屋企過節。休季期間已經積極訓練操「弗」自己，不過佳節當前，占士都忍唔住擦餐勁，事後就「港女」上身，話好後悔自己一時衝動食咗咁多嘢，塞到個肚飽晒喎。雖然係咁，以大帝加埋兩位巨頭拍檔K艾榮同路夫嘅實力，周六對住冇晒球星孭飛嘅溜馬，唔係唔贏啩？（now635台明日8:30am直播）
而另一位超級球星拜恩，今季復出後一手一腳帶住湖人班波，結果打成咁真係身心俱疲，就嚟輸到唔識笑咁滯；難得可以休息吓，就梗係把握機會同老婆Vanessa開心吓啦；睇住兩位幸福滿瀉嘅自拍相，睇怕都係拜恩開季以嚟笑得最燦爛嘅一次喇。
至於馬刺嘅法國籍前鋒戴奧亦都入鄉隨俗，喺instagram post咗張早兩日派飯時影落、扮食大餐嘅相；不過，佢未開季已經俾教練普波域治勒令減肥，搞到食大餐都唔可以太高調。
識睇，一定係睇足英台【英波Live】：
http://soccer.appledaily.com
http://bit.ly/engballlive