旺角由市民佔領變咗差人佔領，雖然狼振英日前呼籲市民去旺角「鳩嗚」，但𠵱家行過都隨時食差人警棍，仲邊有人敢去。難為旺角好多食店、舖頭老闆仲喺鏡頭前撐清場！點知民建聯黃定光仲慌佢哋唔死，噚日話夜晚出旺角「鳩嗚」係「借題發揮」，好似想班食店、舖頭老闆執笠先安樂！
辣㷫老闆：要人執笠先安樂？
話說黃定光噚日同埋成班建制派議員見記者晒馬，發表聯合聲明撐警，當有記者話市民係去消費喎，黃定光好權威咁話，商戶係有營業時間，深夜時分仲話去旺角「鳩嗚」嘅人，擺明係「借題發揮」，「明眼人會睇得出」，仲話深信全港市民都「心知肚明」。
八方就拎黃議員呢個「明眼人會睇得出」嘅論點，走去問一個喺旺角開食店嘅小老闆，佢聽完之後好「激情」咁問候黃議員，之後好㷫咁話：「知唔知旺角有幾多食店做消夜客呀？知唔知好多食店係開到半夜兩、三點，甚至通宵營業呀？𠵱個黃定光咁講，即係叫人咪去旺角消夜？係咪要佢哋執笠先安樂？斷人衣食等同殺人父母呀！」
公民黨梁家傑同八方講，佢相當不敢苟同黃定光嘅講法，話「我隻眼同黃定光一定好唔同」，「唔知點解去西洋菜街、砵蘭街、放工行過嘅市民，一定預咗係去搞事嘅？」聽傑哥咁講，黃定光今次肯定又得罪唔少旺角街坊同老闆，不過按禮義廉一向做事方法，梗係唔認錯喇！
李八方
mailto:[email protected]