正所謂三軍未動糧草之行，巴塞隆拿下周日西甲作客華倫西亞嘅大戰前夕，就梗係要搞下犒賞行動，不過堂堂班霸梗係唔係派餅派糖咁孤寒，而係派車。巴塞同「4圈」車廠一年一度嘅派車活動周四舉行，連因傷一場都未踢過嘅華美倫，都分到架旅行四驅車Q7。
華美倫一場未踢過
𠵱家做球員福利就認真多，一線球隊好似巴塞、皇馬、拜仁、曼聯咁，背後都有車廠支持，每年都有新車揸，今年「4圈」又向巴塞職球員派車，唔知係唔係班巴塞兵「驚死」，型仔超跑R8就冇人揀，反而安全啲嘅四驅車就最多人揀，好似Q7就有13個職球員揀，有教練安歷基、中場恩尼斯達、中堅碧基等，今季加盟嘅華美倫亦都有揀，不過佢因傷今季仲未落過場，𠵱家仲話要接受大腿手術，要休息至少5個月，巴塞真係要安排個傷殘泊車位畀華美倫用。美斯就揀咗房車款嘅A7，尼馬同蘇亞雷斯就揀較輕巧嘅四驅車Q5。
有權利就當然有義務，巴塞都安排咗兩大前鋒美斯同尼馬，的吓波介紹吓「4圈」新車嘅電能回收系統有幾勁；雖然美斯啱啱破咗西甲累積入球紀錄，周中歐聯又入3粒，係威係勢，不過《阿斯報》就忽然爆料，話美斯準備以2億鎊嘅轉會費，加盟車路士咁話。美斯團隊當然否認，亦都鎖定爆料者係一個阿根廷記者，不過美斯同佢完全唔熟，亦都冇好似呢位阿根廷記者咁講，學緊英語準備轉戰英超咁話。
小白邀粉絲住小農莊
其實好多巴塞王朝嘅功臣，都名成利就，反而開始部署退休生活，30歲嘅「小白」恩尼斯達就喺西班牙卡斯提亞拉曼查整個小農莊，出邊種晒葡萄樹，小屋亦都好簡潔。小白好大方，話要喺農莊網頁留言100字，講吓點解要獲招待，小白就會安排得獎者去嗰度住番兩日一夜㖭，有興趣嘅球迷可以上 https://www.airbnb.es/rooms/4521684參加。
識睇，一定係睇足英台【英波Live】：
http://soccer.appledaily.com
http://bit.ly/engballlive