周四歐霸盃分組賽，兩支英超球隊齊齊贏波，提前鎖定出線席位。不過熱刺喺主場擊敗柏迪遜一仗就有手尾跟，有球迷不停落場騷擾比賽，累到熱刺面臨被罰。
熱刺靠史譚保利一戰定江山，喺主場1:0小勝柏迪遜，全取3分後已經領先第3位嘅卓普利斯6分。不過熱刺喺呢場波有麻煩，上半場有3個球迷衝咗落場搞事（圖），令場波要暫停10分鐘，事後隨時俾歐洲足協追究處分。熱刺喺下月煞科戰作客同樣喺C組出咗線嘅比錫達斯，唔輸嘅話就可以首名出線。
至於愛華頓就由一對比利時球員盧卡古同埋米拿拉斯各入一球，作客2:0贏禾夫斯堡，率先喺「死亡H組」首名出線。至於剩返一個出線席位就由禾堡同里爾爭，禾堡作客里爾要唔輸先可以拎到次名出線席位。除咗英超球隊之外，意甲喺周四歐霸盃表現都唔失禮，國際米蘭、拿玻里同埋費倫天拿都夠分提早確定出線；惟獨是拖連奴仲爭少少，主場0:0賽和布魯日，要到最後一輪分組賽先知晉唔晉到級。
識睇，一定係睇足英台【英波Live】：
http://soccer.appledaily.com
http://bit.ly/engballlive