自由黨田少退位，下個月改選領導層，零售界議員方剛應該接任黨魁，八方聽聞，黨主席都好可能換人，周梁淑怡同田少共進退，黨內消息稱接班人選，極大機會係紡織界議員鍾國斌。鍾國斌50出頭，政治上唔算出位，黨內人士認為佢做主席，令人安心。
各政黨都盤算未來兩年選舉部署，自由黨亦然，做過政治助理嘅楊哲安，應該會出選區議會，而林大輝與自由黨密斟入黨一事，消息人士透露應該好事近，如無意外，林大輝最快明年1月正式入黨，至於入黨後如何擺位，仲要慢慢傾。林大輝幾年前高調拉攏各區區議員組成「社區18」，可惜不成氣候，去年加入沙田老牌地區政團公民力量，之後公記同葉劉新民黨「行埋」，林大輝又要另外搵路行，一番雄心，八方希望佢喺加入自由黨後，真正起風雲。