民建聯葉國謙日前睇完段所謂冇剪接過嘅事發影片，就話now新聞台工程人員用鋁梯打人，而now新聞台噚日又率先爆料，話葉國謙睇嗰段片正係佢黨友兼IT人葛珮帆傳畀佢。究竟發生乜嘢事呢？
now噚日報道話葛珮帆喺建制派同埋民建聯中委嘅討論群組，發放一條聲稱完整事件嘅片，連元秋姐都信咗係真，於是就有葉國謙喺電台話見到工程人員打人呢件事。噚日葉國謙、葛珮帆同埋其他建制派出嚟開記招時，阿謙就大大聲話now報道有錯，條片唔係葛珮帆畀佢嘅，仲姑隱其名話係一位「朋友」畀佢啫，至於葛珮帆就唔出聲，八方想問佢，佢都話阿謙講咗，冇補充，咁樣推來推去、敢做但冇人認，唔通呢個就係民記作風？