雨傘革命噚日超過兩個月，雖然連日嚟堅守住嘅旺角，場已清，但卻清唔走港人真普選嘅決心。視香港為第二個家嘅傑志狂牛守衞丹尼，近月更化身自由撰稿人，將呢場雨傘革命以圖文並茂咁話番畀班西班牙鄉里知。
丹尼掛靴考慮做文化界
雨傘革命雖然暫未成功，但已引起全球大部份地方關注，嚟到香港定居近5年嘅傑志西班牙籍左閘丹尼透露：「西班牙好多人對香港發生嘅事都好好奇，所以我想盡力畀佢哋明白呢度發生咩事。」擁有法律及傳理雙學位嘅丹尼話，祖家西班牙《ABC報》嘅總監係佢嘅大學教授，所以早前寄咗自己嘅履歷畀佢，睇吓有冇嘢需要幫手，大約兩個月前，即係催淚彈事件前後，就正式收到佢哋回覆，為佢哋做自由撰稿人報道雨傘革命。
「我會親身去到佔領區，同嗰度啲人傾偈。雖然唔係個個識英文，有時幾有難度，但香港傳媒啲資訊更新得好快，好幫到手。」效力傑志近5年，協助勇奪6個錦標嘅丹尼坦言，香港只得一份主流嘅英文報紙，要去了解件事，就要去搵唔同嘅資料，會對件事明白更多，揸住撐學生嘅黃絲帶影相嘅丹尼仲講笑話：「貼黃絲帶影相見報，我咪上唔到大陸？」
不過，作為專業嘅記者，丹尼表明對事件唔會有太多意見，「我唔會評論警察或者學生，宗旨就係將事件如實報道，由讀者自行判斷。」年屆33歲嘅丹尼話，嚟咗香港咁耐，囝囝喺度讀書，早已視香港為第二個家，即使第時掛靴都會選擇留港。「以往喺西班牙要兼顧讀書同踢波雖難，但足球生涯有限，我哋又唔係超級球星，總要去諗下一步同將來。喺香港做記者雖然唔係咁易，但我掛靴後想做教練教小朋友之餘，亦都考慮寫嘢做副業。」
傑志再簽前西班牙國腳
另外，傑志總領隊伍健前晚喺fb透露，球隊正式聘用曾效力華倫西亞等西甲隊嘅防中安干加為傑志足球學校教練；希望呢位前狂牛國腳可以帶領小球員打好基礎，打造更多小丹尼。
識睇，一定係睇足英台【英波Live】：
http://soccer.appledaily.com
http://bit.ly/engballlive