港大前日公佈委任Leica經典相機收藏家蘇彰德做專責大學拓展副校長，為大學籌款旗手，成為馬斐森校長「內閣」成員。蘇之前係馬會慈善事務執行總監兼首席法律顧問，9月中離開做咗14年嘅馬會，忽然轉投高教界，港大中人以至本地學術界都好意外。
八方聽聞，蘇彰德同港大校務委員會主席梁智鴻交情幾好，而目前負責港大籌款工作係發展及校友事務部，主管係有「港大護法」之稱嘅徐詠璇，港大中人稱，相信蘇彰德上任後，可減輕徐詠璇嘅擔子。去年港大宣佈委任馬斐森做校長，幾位資深教授程介明、陳婉瑩及盧寵茂公開反對，據八方了解，其實背後仲有另一位歷事幾朝嘅老臣，家陣新校長有新副手，港大「花生友」笑言，希望各位大教授都真係深慶得人啦。