體育新聞王子宣佈離開大台，今晚同各位體育迷道別，人各有志，小弟衷心祝福佢，喺另一個環境闖出一片天。喺佢嘅面書留言中，其中一點對我哋體育界傳媒發人深省，就係6點半新聞冇咗體育新聞部份。
電視台係商業機構，佢哋嘅決定都係考慮觀眾關注程度，雖然殘酷都無可厚非，正如《體育世界》如有30點收視，電視台就唔會安排節目喺周末下午嘅雞肋時間播。
唔係話外國嘅月光特別圓，體育新聞喺唔少體育大國比重一啲都唔細，國際足協嘅金球獎，外國足球傳媒有份投票，《隊報》、《米蘭體育報》、《世界體育報》，唔少歐洲國家都容納到專講體育嘅報章，甚至地位亦相當高。
當然體育新聞亦無可避免面對狗仔化、娛樂化嘅影響，英國《每日郵報》每場英超大戰後，其實都有好詳盡戰術分析，配以戰術、熱能走位圖等，又請嚟加歷查、基昂等老牌國腳分析，但可惜體育頭版或者網站當眼位置，總係留住娛樂化新聞，甚麼巴神又買新法拉利、朗尼老婆又去邊度蒲、尼馬又有咩新歡等。
體育新聞娛樂化氾濫，更衍生假新聞情況，巴洛迪利（圖右）日前就抱怨，傳媒為咗銷量不惜醜化佢，而C朗、伊巴等巨星都批評過，英國傳媒冇訪問過佢哋嘅情況下，就硬生生作咗專訪出嚟。以後大家睇搞笑體育新聞時，不妨多花幾秒，睇一睇認真專業嘅正經新聞。
文：牽牛